我雖然貪靚，但好少化 “full set” 或濃妝，只係返工成日唔夠瞓，精神一般，為免影響市容，總會化少少淡妝，例如配合自己膚色嘅粉底，加唔太深色嘅胭脂同唇膏，化咗都唔係好覺嗰種，旨在等個人望落精神啲。
某星期五晚放工飯局之後，我攞枝唇膏出嚟，F 對我講。。。
F：嘩，十點幾喇，冇人睇架喇！
我：嘻嘻，唔知架，夜猛猛，如果撞到人，嚇親人就唔好啦！
事隔幾日，臨放工時我又攞枝唇膏出嚟補補啲色，今次到 I。。。
I：都放工啦，唔駛補喇。。。
我：嘻嘻，就係放工，做咗成日野，至要執執，你知我架啦。。。
I： 哈哈，Okay 喎，冇問題。。。
我：哈哈，係咪架？我可能慣咗，點都要執執，我只會做運動時完全唔整（冇化妝）， err 。。。應該咁講。。。我唔會變態到化晒妝去做運動咁囉。。。
點解？
其實化妝去做運動，唔止「變態」，對皮膚應該唔會好，因為做運動會流汗，啲化妝品 block 住皮膚出汗，一定唔係好事。而且，做運動時增加血液循環，面色自然好，人都靚啲啦，重駛乜化妝呢？
